أنتيكخانة للعشاق

-1-
شفتِك
وانتى شايلة حمل الازار
وبتلضمى المقطوع
وبتخافى
أحسن تسهى
وتعشقى حاجة
لاتنكسر
-2-
هشرب كل حاجة
م الابرة أم تعريفة
للغنوة أم صاغ
صوتى شايل حبايبه
على اسطوانة مشروخة
"بعد العِشا"..
بيبرد كل شىء
عندى ..جرامافون قديم
بعته فى مزاد للأنتيكات والتحف
تمن الحاجات بتزيد
لما تتحول لأنتيكة
"بعد العِشا "..بتعضنى الساعة
الزمن بيتحول
لشزلونج للعيانين
هما هما ..ما اتغيروش أبدا
اللى لسة بشوق
بيحكوا
عن الابرة أم تعريفة
والغنوة أم صاغ
-3-
اتخض
لما حس إن اللى يعرفه
عن غابات القسوة اللى جواه
مش كتير
وإن عصير البرتقان اللى فى روحه
مش
كفاية
اتخض أكتر
لما اكتشف ان القسوة
ممكن تاخد أشكال ياما
لدرجة ممكن تخليها
فى منتهى النعومة والجمال
لما نزل من بيتهم
ابتسم للصبح
وللناس
وللعمارات
وللأسفلت
ولسواقين الميكروباص
اللى مارضوش يقفوله
ماكانش عايزيقولهم
إنه طيب أوى
هو يدوبك
كان عايز يطمن روحه
-4-
على كتف صندوق الزبالة
قطط سعيدة
وقط بيغنى لوليفته
عن الحنان
وقطة بتناغش عيالها
وتفتش بصبر
عن اللى باقى ..من بقايا الناس
وينفع
للعشوة الملوكى
ولليلة هادية
من الوصال
-5-
عشقنى ورد
فخبيته فى دمى
من ناس ماعشقتهوش
الناس اللى دايما
فى إيدهم ورد
بيلاعبوا بيه الدنيا ع المشاريب
الدنيا اللى دايما
مخبية كارت
مدرياه فى دمى
من ناس ماعشقتهوش
-6-
حتى
لما انحنى الوقت للعشاق
وحطهم على العرش
كل اللى قدروا يملكوه
شال حرير
وعقد فل
وخصلة من شعر أسمهان
وصندوق مزيكة
-7-
قام العجوز
يحيى ساعة الفجر
اتوضى من نور جبينه
أربع ملايكة وعفريتين من جن
نام الشيطان على جمر
نده العزيز :ياقوى
رد القوى :ياعزيز
وعند عتب الباب
رفع الآدان على كتفه
واستناخ له الطريق
فى السما
انكتبله النخل
والأرض باهت بيه
أربع ملايكة
وعفريتين من جن
قامت وقالت للعزيز:ياقوى
نده القوى :ياعزيز
-8-
شال الحمام شاله
لبياع عنب
وانحنت أسراب كتير من نمل
للكناس..
رفعوا الملايكة ست حبلى
للدور الحداشر
وغطوا نص رغيف
لواحد جعان
والسر رغم وعورته وإنفته م الخلق
فتح قلبه ببساطة للمجذوب
....
وحده كرباج الأمير
هو اللى لسوع وحدته
وقلقلوه الشياطين
فى النومة

-9-
هتسمينى فرقع لوز
وتركبنى على حمارة
شكلها مضحك
ومالهاش سرج
هسميها سندريلا
وأنا الأميرالوسيم
على فرس أبيض
وشفايفى أجمل م النبيت
مع إنى فرقع لوز
راكب على حمارة
شكلها مضحك
ومالهاش سرج
-10-

ست بتكبر
كل ما ياكلها الوقت
تأكل وشها مكياج
ست
بأوامر الدكتور
بتحزن بشويش
ولكن غصبن عنها
بتفرح على غفلة
شالها الوقت ..فشالت وياه
عداها الوقت ..فما بقتش تعد الأيام
"بشويش ..
بشويش"
صرخت أم العضم أخف
من بصبصة الجار
والنسمة اللى بيحدفها الشيش
-11-
فى شارعنا
ميكانيكى اسمه "على "
شاورت عليه الحدايات
فاتحول لقرنى ..
فى شارعهم
كانت سعاد بتغسل الكمترى
عشان وقت أبيض وناعم
شاورت عليها الحدايات
فباعها "على"
للعيال ع الناصية
وللحدايات
........
فى قلبى
شوارع كتير بتغسل الكمترى
للعيال ع الناصية
ويوماتى
بغافل الحدايات
مرة بعمل عبيط فى مولد
ومرة مجذوب فى حضرة
عشان ما تعرفنيش
-12-
فتشت فى ذكرياتِك
فى دولاب هدومِك
عنه
الحبيب
اللى سنة قلبه لولى
وشفايفه تين
واللى دايما زى سور
بينى وما بينِك
فتشت
بحرقة العاشق
ولوعة المخدوع
مالقتوش
مع أنه دايما زى سور
بينى وما بينِِك
-13-
القهوجى اللطيف
الى اسمه عادل
فهمنى درس لطيف
إن المخدوعين هما بس
اللى بيأيدوا الحب ع النوتة
وإن الحكمة اللى تنفع
واحنا بنتستقبل نهارنا
إن الشكك ممنوع
وإن حتى الابتسامة
لازمها تيبس
.......
لما قابلتها
واجهتها بالنوتة
اللى شايلة حساب مشاعرى
شالت مشالها
وجريت
تدور ع الحساب التقيل
عند ناس غيرى
سابتلهم
مشاعرها ع النوتة 

Top of Form

* أحمد الفخراني 2007